SENSIBILIZAR LOS PARLEMENTARIS E LOS ELEJUTS LOCAUS

Lo Congrès qu'ei ua institucion independenta representativa deus actors e deus utilizators de l'occitan qui velha au respècte deus drets fondamentaus e a la promocion deu son usatge.

Informar las collectivitats e los lors elejuts que permet de'us « aculturar », de'us har préner consciéncia de la riquessa qui la lenga e la cultura e representan entau lor territòri.

Lo pòle Lenga & societat deu Congrès que prepausa sessions d'informacion sus çò qui ei la lenga, la soa istòria, quin s'escriu, quin la se pòden nommar, quau ei la cultura qui i ei ligada... Que pòt tanben sensibilizar a las politicas lingüisticas, explicar quin e's mian, presentar los diferents actors qui òbran entà l'occitan, suus quaus talas politicas d'aqueras e's pòden emparar.

La sensibilizacion que passa tanben per l'entercalhada deus candidats entà'us incitar a préner posicion sus las problematicas ligadas a la politica lingüistica, entà qu'aquera question aja tota la soa plaça pendent los debats electoraus.

Tot parièr, lo pòle Lenga & societat deu Congrès qu'òbra au demiei d'autes entà sensibilizar los parlamentaris, deputats e senators, entà que mien ua reflexion entà ua reconeishença legau, favorabla au desvolopament de las lengas ditas regionaus.

Los nostes servicis

Acompanhament politica lingüistica

Perqué e quin miar ua politica qui intègra e hè vàler la lenga occitana ? Sensibilizacion e acompanhament au près d'elejuts, de collectivitats...

Quina plaça per l'occitan ?

Quina plaça entà la lenga occitana dens l'ensenhament, dens la societat en generau ? Quina reconeishença ? Quin estatut ?

E voletz precisions ? Afinar lo vòste projècte ? Avetz ua demanda particulara ? Contactatz-nos.