Socializacion

Ua lenga minorizada qu'a besonh d'estar vista e lejuda, vededera dens l'espaci public. Que pòt atau existir a l'uelh deus qui non la coneishen pas, e la soa preséncia dens l'espaci sociau qu'aconòrta la practica deus qui l'an « popada » en familha tau com los qui l'aprenen a l'escòla, l'universitat, la formacion professionau o los cors entaus adultes. Lo pòle Lenga & societat deu Congrès qu'òbra atau a crear un environament favorable de practica de la lenga entà tots los qui la comprenen, qui la parlan drin o correntament.

Aquera socializacion lingüistica que pòt interviéner pertot e a cada moment, e cadun que'n pòt estar actor : ua collectivitat qui met en plaça ua senhalizacion bilingua, ua enterpresa qui intègra l'occitan en la soa comunicacion, ua associacion qui vòu que la lenga sia presenta pendent un eveniment qui organiza, un particular qui causeish un nom d'ostau, un tatoatge, un menut, un epitafi en occitan…

Causir la lenga d'òc qu'ei afichar l'estacament a l'endret on s'i viu, soslinhar lo son ancoratge locau, desmarcà's individuaument o collectivament per l'identitat deu territòri. Qu'ei au còp un ligam sociau e un har vàler immateriau.