La socializacion de la lenga que passa per ua mei grana visibilitat. Que prepausam servicis de traduccion-conselh entà vs'ajudar a decidir quin méter en plaça au mei plan lo bilingüisme dens los vòstes contienuts. Ei mei pertinent de tradusir la totalitat d'un site web o solament quauques paginas/títols ? A quins endrets ua senhaletica bilingua e serà la mei plan adaptada ? Quin integrar la lenga en la mea comunicacion entà valorizar l'estacament de la mea enterpresa a la cultura deu son lòc d'implantacion ?
Atau, lo pòle Lenga & societat deu Congrès que's carga de traduccions qui arriban de comandas de collectivitats territoriaus, mes tanben d'associacions, d'enterpresas o enqüèra de particulars. Que pòden estar hèitas sus divèrs supòrts : sites Internet, pocheta de DVD, desplegants toristics, comunicacion institucionau, etc. Entad aquò har, que ns'apressam de traductors exteriors remunerats en vista d'estructurar la cordèra.
Tot parièr, si desiratz conéisher la significacion deu vòste nom de familha, que'vs podem assabentar. Fin finau, si desiratz montar ua estructura enradigada dens lo son territòri, que'vs podem ajudar a trobar un nom qui'u convienga, adaptar lo son eslogan en « lenga de noste »...
